OPINI | 06 April 2013 | 22:51 
Dibaca: 19 
Komentar: 0 
Nihil
Rasa batumpal kalawasan duduk ditaksi, Alhamdulillah sampai jua Julak ka desa Solan. Nang ngaran sudah baniat matan rumah handak badapatan wan Utuh Karas. Dalas maharit lapar si Julak takuliling batakun kasana kamari. Napang umun tulak bahapal, kada tahu alamat pasti tatap jua sidin tulak mancari'I dangsanak angkat tu wan-ai.
Labih dua puluh tahun jar sudah kada suah badapatan. Wayah sudah ba bau syurga si Julak kaganangan kaya urang karindangan. Sabujurannya kahada jua pang, tapi sidin tu baharinya sa guru, nang basimpanan sirih badapat urat jar. Ujar kesah urang jua, siapa nang basimpanan sirih badapat urat amun kada kawa meyampukakan daun sirih wan kaduanya, lambat jar ji'un, kada mau bakalahan. Han urang bahari kesahnya.
Dangsanak nang bangaran Utuh Karas ne kadada nang tahunya siapa ngaran sabujurannya. Cuma si Julak suah bakesah," ngarannya Utuh ti pang kada lagi sasambungannya" jar Julak. Tapi urang barataan manyambat Utuh Karas tu asal muasalnya urang Sungai Karias di Amuntai. Utuh urang sungai Karias…lawas kalawasan he he he bahandap jadi Utuh Karas. Sundaga-an pagalangan ganal banar wan karas karasnya.
Pas sampai di Solan, si Julak batakun kasana kamari kada urang nang tahu. Ada jua nang tahu ngaran tapi kada tahu alamatnya. Jangankan tahu alamat ikungnya dnang bangaran Utuh Karas kada suah batamuan, mandangar habar bin habar jua tahu di ngaran tapi kada tahu urangnya. Ada jua nang bapadah tahu wan Utuh Karas…" tapi ulun kada tahu jua alamatnya kai-ai, kalu pang sudah pindah madam ka Handil Dua, Balikpapan" jar nanang pa-ojekan. Bah jua…bahapal banar si nanag ojek ne.
Haus bin lapar jua si Julak takuliling batatakunan. Dudukai sidin di warung sambil bakesah mancari dangsanak angkat tadi. Pas rajaki si si Julak tang ada ja nang manyahuti.
"Itu nah sampean nanya ka'e-ai kalo kada salah ibu itu nah bu'tuh karas."
Sakalinya nang mamadahan tadi pas urang Jawa.
He he he…"tarima kasih nak lah aku handak batakun langsung haja wan bu'tuh karas".
Siapa yang menilai tulisan ini?http://bahasa.kompasiana.com/2013/04/06/folklore-banjar-mancari-dangsanak-bangaran-utuh-karas-543580.html